Атбасардағы төтенше жағдайлардың алдын алудың балама нұсқасын қоғам белсенділері аймақ басшысы Мәлік Мурзалинге ұсынды.
Бұл туралы облыс әкімінің баспасөз қызметі хабарлады.
Ақмола облысының әкімі жұмыс сапарымен Атбасарда болып, су тасқынының салдарын жою бойынша жүргізіліп жатқан жұмыстарға баға берді. Атбасар-Қиыма тас жолындағы су өткізгіш құбырды нығайту бойынша құрылыс-монтаж жұмыстарын, жер үйіндіні қалпына келтіру, No1 орта мектепте жүргізіліп жатқан жөндеу жұмыстарының барысын қарап шықты. Сондай-ақ Мәлік Мурзалин 45 пәтерлік тұрғын үйлердің құрылыс алаңын, салынып жатқан жаңа үйлердің қазандығын аралады.
Бұдан кейін аудандық мәслихат депутаттары мен қоғамдық кеңес мүшелерінің қатысуымен Атбасар ауданында төтенше жағдайлардың алдын алудың баламалы нұсқасының тұсаукесері өтті. Аудан әкімі Аманбек Қалжанов бұл мәселеге қатысты атбасарлықтардың пайымымен бөлісті.
«Жақында қоғамдық тыңдаулар өтті, онда ұсыныс талқыланды Жабай өзенінің бойында астаналық бөгет салудың орнына барлық тұрғындарды жағалау аймағынан жаңа тұрғын үйлерге көшіру керек», — деді Аманбек Қалжанов.
Аудан әкімінің айтуынша, Атбасарда өнеркәсіптік бөгет салу республикалық бюджетке шамамен 9 миллиард теңге шығындалады, сонымен қатар оны ұстауға жыл сайын 200-300 миллион қаражат қажет. «Жаңа шағын аудан салу және су басу аймағынан тұрғындарды жаңа жайлы пәтерлерге көшіру — біз үшін қолайлы нұсқа. Үнемделген қаржыға өзен арнасын тазалап, тереңдету жұмыстарын жүргізе алдық», — деді А.Қалжанов.
Мәлік Мурзалин облыс әкімінің орынбасары Василий Крылов пен салалық басқарма басшыларына атбасарлықтардың ұсынысын экономикалық және әлеуметтік орынды ескере отырып, тезірек зерделеуді тапсырды.
